पुणे: येथील साडेसतरानळी परिसरात पाच-सहा जणांच्या टोळक्याने काही दुकानांसह विविध वाहनांची कोयत्याने तोडफोड करून दहशत माजवण्याचा प्रयत्न केला. काल रात्री साडेनऊ वाजेच्या सुमारास हा प्रकार घडला. पोलिसांनी त्यातील तिघाजणांना ताब्यात घेतले असून इतर साथीदारांचा शोध घेतला जात आहे.

येथील पालिकेच्या शाळा परिसरात सुरूवातीला या तरूणांनी दुकानांमध्ये शिरून तेथील साहित्याची तसेच, रस्त्यावरील वाहनांची कोयत्याने तोडफोड केली. त्यानंतर हे टोळके पाईपलाईन चौकातील एका मिठाईच्या दुकानात शिरून त्यांनी तेथील मिठाईचे काचेचे कपाट, फ्रीज व इतर साहित्याची तोडफोड केली. त्यानंतर ते मुंढवा रस्त्याजवळील संदीप हॉटेल परिसरात गेले व तेथेही काही वाहनांची तोडफोड केली. या टोळक्याने नशा केलेली असल्याचे नागरिकांनी सांगितले. दरम्यान, पोलिस उपायुक्त अनुराधा उदमले व पोलिस निरीक्षक संजय मोगले यांनी घटनास्थळी भेट देवून परिस्थितीची माहिती घेतली. पोलिसांच्या पथकाने टोळक्यातील तीन जणांना ताब्यात घेतले असून इतरांचा शोध घेतला जात आहे.