पुणे शहरात गेल्या दोन दिवसांपासून सुरू असलेल्या मुसळधार पावसामुळे पुण्यातील अनेक भागांना नद्यांचे स्वरूप प्राप्त झाले आहे. त्याचा मोठा फटका कोथरूडमधील उच्चभ्रू सोसायट्यांना बसला असून ३ ते ४ सोसायट्यांच्या परिसरात थेट गटारीचे पाणी शिरल्याने नागरिकांनी संताप व्यक्त केला आहे.

या भागातील गटारे तुंबल्यामुळे सांडपाणी थेट सोसायटीच्या पार्किंगमध्ये शिरले आहे. काही ठिकाणी तर पाणी कंबरेपर्यंत साचले असून त्यामुळे रहिवाशांना घरात प्रवेश करणेही कठीण झाले आहे. या सांडपाण्यामुळे परिसरात प्रचंड दुर्गंधी पसरली असून आरोग्याचा गंभीर प्रश्न निर्माण झाला आहे.

स्थानिक नागरिकांनी महानगरपालिकेकडे तक्रार केली असून अद्याप कोणतीही तातडीची कारवाई झालेली नाही. प्रशासनाने तत्काळ उपाययोजना करून नागरिकांना दिलासा द्यावा, अशी जोरदार मागणी होत आहे.