पुणे शहर आणि उपनगरांमध्ये आज जोरदार पावसाने हजेरी लावली असून अनेक भागांमध्ये जलजमावाची स्थिती निर्माण झाली आहे. कॅम्प परिसरातील शासकीय विश्रामगृहात पाणी शिरल्याचे दृश्य पाहायला मिळाले आहे, तर शिवणे परिसरात रस्ते पूर्णपणे जलमय झाले आहेत.

सखल भागांमध्ये मोठ्या प्रमाणात पाणी साचल्यामुळे नागरिकांची गैरसोय झाली असून शहरातील वाहतूक व्यवस्थाही कोलमडली आहे. पावसामुळे अनेक ठिकाणी वाहतुकींवर परिणाम झाला असून वाहनचालकांना अडथळ्यांचा सामना करावा लागत आहे. महापालिकेच्या पावसाळी तयारीवर यामुळे पुन्हा एकदा प्रश्नचिन्ह उपस्थित होत आहे. पावसाच्या या अचानक तडाख्यामुळे प्रशासनाची तयारी अपुरी ठरत असल्याचे स्पष्ट होत आहे.