पुणे: शहरात पुन्हा एकदा फ्लेक्सबाजीचा वाद पेटलाय. भाजपच्या खासदार मेघा कुलकर्णी यांच्या विरोधात वादग्रस्त मजकूर असलेले फ्लेक्स लावण्यात आल्याची घटना समोर आली असून, या प्रकरणी डेक्कन पोलीस ठाण्यात गुन्हा दाखल करण्यात आलाय.

डेक्कन पोलिसांनी दिलेल्या माहितीनुसार, कमलेश प्रधान या व्यक्तीने यासंदर्भात तक्रार दाखल केली आहे. तक्रारीनुसार, बालगंधर्व चौक परिसरात "कोथरूडच्या बाई तुम्हाला एवढीच खुमखुमी असेल तर बुधवार पेठेचे नाव मस्तानी पेठ करा" अशा आशयाचा फ्लेक्स झळकवण्यात आला होता. या फ्लेक्सवर गिरीश गायकवाड, अतुल दिघे आणि विलास सोनवणे ही नावे छापण्यात आली होती.

सदर फ्लेक्सबाजी प्रकरणात अज्ञात व्यक्तींविरोधात महाराष्ट्र मालमत्ता विद्रुपीकरण प्रतिबंध अधिनियम 1995 चे कलम ३ तसेच महाराष्ट्र महानगरपालिका अधिनियम 1949 चे कलम 244 आणि 45 अंतर्गत गुन्हा दाखल करण्यात आला आहे.

सध्या पोलिसांकडून सीसीटीव्ही फुटेजच्या मदतीने या फ्लेक्सबाजीमागील आरोपींचा शोध घेण्यात येतोय. या घटनेमुळे पुणेतील राजकीय वातावरण पुन्हा एकदा तापण्याची शक्यता आहे.