पुणे: आंबेगाव येथील प्रिस्टीन पॅसिफिक सोसायटीच्या हद्दीत असणारी भिंत अज्ञातांकडून जेसीबीच्या सहाय्याने पाडण्याचा धक्कादायक प्रकार घडला आहे. हा प्रकार रात्री सव्वाआठ वाजण्याच्या सुमारास घडला. दरम्यान सोसायटीतील सदस्यांच्या ही बाब निदर्शनास आल्यानंतर त्यांनी भिंत पाडणाऱ्या जेसीबीकडे धाव घेतली. जेसीबी चालकाने संबंधित ठिकाणाहून पळ काढला. त्यानंतर वेताळनगर येथील स्थानिकांनी सोसायटीधारकांवर दगडफेक केल्याने परिसरात काही वेळ तणावाची परिस्थिती निर्माण झाली होती सोसायटीधारकांमध्ये भीतीचे वातावरण निर्माण झाले होते. त्यानंतर भारती विद्यापीठ पोलीस ठाण्याच्या पोलिस अधिकाऱ्यांनी तात्काळ घटनास्थळी पोहचून परिस्थिती नियंत्रणात आणली.

प्रिस्टीन पॅसिफिक सोसायटीच्या जागेवर गाव नकाशावर नोंद असलेला एक नैसर्गिक नाला होता. तो नैसर्गिक नाला बुजवून त्याठिकाणी अगरवाल बिल्डरने सोसायटी उभी केली असल्याचा दावा वेताळनगर येथील रहिवाशी करत आहेत.या नाल्याच्या जागेहून वेताळनगरला रहदारीसाठी रस्ता सद्यस्थित सोसायटीधारकांनी बंद केला असल्याचे मत वेताळनगरचे स्थानिक व्यक्त करत आहेत. तो रस्ता खुला करण्यात यावा यासाठी स्थानिकांनी उपोषण देखील केले होते. परंतु त्यावर पालिका प्रशासनाकडून तोडगा निघत नसल्याने त्यांनी हा मार्ग अवलंबिला असल्याची शक्यता वर्तवली जात आहे.