कोल्हापूर : मुख्यमंत्री एकनाथ शिंदे यांना प्रकाश आवाडेंची समजूत काढण्यात यश आलंय. हातकणंगले लोकसभा मतदार संघासाठी प्रकाश आवाडे इच्छूक होते. हातकणंगलेतून ते लोकसभा निवडणूक लढवण्यासाठी आग्रही होते. पण अखेर आता प्रकाश आवाडे यांनी माघार घेतल्याची माहिती समोर आलीय. आवाडेंची नाराजी दूर करण्यात मुख्यमंत्री शिंदे यांना यश आलं. पाऊण तास झालेल्या चर्चेनंतर प्रकाश आवाडे यांनी माघार घेतली. प्रकाश आवाडे यांनी केलेलं बंड अखेर थंड झालं. मुख्यमंत्र्यांच्या गाडीतूनच प्रकाश आवाडे यांच्यासह जिल्हाधिकारी कार्यालयात पोहोचले. आवाडे आता महायुतीला पाठिंबा देणार असल्याचंही स्पष्ट झालंय. हातकणंगले लोकसभा मतदार संघातून महायुतीच्या वतीने धैर्यशील माने यांना उमेदवारी देण्यात आली आहे.