अमित शाह यांनी केलेल्या वक्तव्याविरोधात वंचित बहुजन आघाडी आक्रमक झाली आहे. मुंबईच्या सीएसएमटी स्टेशनच्या बाहेर वंचितने आंदोलन केलं आहे. राज्यसभेत केंद्रीय गृहमंत्री अमित शाह यांनी डॉ.बाबासाहेब आंबेडकर यांच्याविरोधात केलेल्या वक्तव्याचा निषेध करत घोषणाबाजी करण्यात आली आहे. यावेळी मोठ्या संख्येने कार्यकते उपस्थित होते.

दरम्यान, यावेळी प्रकाश आंबेडकर यांनी देखील या आंदोलनस्थळी दाखल होत अमित शाह यांच्या वक्तव्याचा निषेध केला आहे. प्रकाश आंबेडकर यांनी यावेळी माध्यमांशी संवाद साधला. ते म्हणाले की, 'अमित शाह यांनी डॉ. बाबासाहेब आंबेडकर यांच्याबद्दल केलेलं विधान चांगल्या हेतूने केलेलं नाही. त्यामुळे देशात सगळीकडे आंदोलन केलं जात आहे. मुंबईत सुरू असलेल्या अंदोलनाचं प्रतिनिधित्व वंचित बहुजन आघाडी करत आहे. डॉ. बाबासाहेब आंबेडकर यांना राज्यघटनेच्या निर्मितीवेळी जनसंघाचा विरोध होता. आताही राष्ट्रीय स्वयंसेवक संघाचा विरोध आहे. यात नवीन काहीच नाही. त्यावेळी असलेले त्यांचे नियोजन अद्याप पूर्ण होऊ शकलेले नसल्याने त्यांचा जळफळाट होत आहे, अशी खोचक टीका आंबेडकर यांनी यावेळी केली.