उत्तर प्रदेशातील अयोध्येत आज राम मंदिराच्या शिखरावर पंतप्रधान नरेंद्र मोदी यांच्या हस्ते ध्वजारोहण सोहळा पार पडला. या ऐतिहासिक आणि खास कार्यक्रमासाठी अयोध्या नगरी सजली होती. राम मंदिराच्या शिखरावर नरेंद्र मोदी यांच्या हस्ते शिखरावर फडकविण्यात आले. हा भगवा ध्वज तब्बल ११ फूट रूंद आणि २२ फूट लांबीचा असून, अत्यंत भव्य असल्याची माहिती आहे.

डोळे दिपवणाऱ्या या कार्यक्रमात राष्ट्रीय स्वयंसेवक संघाचे सरसंघचालक मोहन भागवत तसेच देशभरातून अनेक मान्यवर उपस्थित होते. यासह साधू संतांची मांदियाळी देखील पाहायला मिळाली. हा भव्य सोहळा दुपारी १२च्या दरम्यान पार पडला. या विशेष भगव्या ध्वजावर भगवान श्रीराम यांच्या शौर्याचे प्रतीक मानला जाणारा तेजस्वी सूर्य, ‘ॐ’ चिन्ह अंकित करण्यात आले आहे. दरम्यान, या विशेष कार्यक्रमानिमित्त शहरातील अनेक ठिकाणी आकर्षक विद्युत रोषणाई करण्यात आली आहे.