पिंपरी चिंचवड: अनधिकृत बांधकामावर कारवाईसाठी गेलेल्या महापालिकेच्या अतिक्रमणविरोधी पथकासमोर एका महिलेने बांधकाम पाडले तर माझ्या बाळाला खाली फेकून देईन व मीही आत्महत्या करीन, अशी धमकी दिली. या प्रकरणी दोघांविरोधात सांगवी पोलीस ठाण्यात गुन्हा दाखल करण्यात आला आहे. सांगवी परिसरात राजाराम लाड आणि निलेश लाड यांनी अनधिकृत बांधकाम केलं होतं. हे बांधकाम पाडण्यासाठी महापालिकेचे अधिकारी आणि कर्मचारी गेले असता लाड कुटुंबातील सदस्यांनी तीन वर्षांच्या बालकाला जाळीतून खाली फेकण्याची धमकी दिली.

तसेच त्यांनी पथकाला शिवीगाळ केली आणि सरकारी कामात अडथळा निर्माण केला. याप्रकरणी सांगवी पोलीस ठाण्यात बीएनएस कलम 132, 352, 351 अंतर्गत गुन्हा दाखल करण्यात आला आहे. पोलीस निरीक्षक अमोल नांदेकर यांनी दिलेल्या माहितीनुसार, गुन्हा दाखल होताच दोघेही आरोपी फरार झाले असून, त्यांचा शोध सुरू आहे.