नांदेडमध्ये तहसीलदारांची गाडी फोडल्याची घटना ताजी असतानाच आज परभणीतही शेतकऱ्याने जिल्हाधिकाऱ्यांच्या गाडीवर दगडफेक केल्याची घटना घडलीय. जिल्हाधिकारी कार्यालयात मंगळवारी पालम तालुक्यातील चाटोरी येथील शेतकऱ्यानं जिल्हाधिकारी संजय चव्हाण यांच्या गाडीवरच दगडफेक केली. संतोष रावण पैके असं या शेतकऱ्यान नाव आहे. संपूर्ण कर्जमाफी मिळावी, तसेच अतिवृष्टी व पावसामुळे झालेल्या नुकसानीची तातडीने भरपाई द्यावी या मागणीसाठी शेतकऱ्यानं जिल्हाधिकाऱ्याच्या गाडीवर दगडफेक केली. जिल्हाधिकारी कार्यालयाच्या परिसरात जिल्हाधिकारी संजय चव्हाण स्वतः उपस्थित असताना अचानक संतोष पैके यांनी गाडीवर मोठा दगड फेकला होता.