मनोज जरांगे पाटील मेळाव्यात काय बोलतील हे पाहणं महत्त्वाचे ठरणार आहे. त्यांच्या आणि आमच्या मेळाव्याचा काही संबंध नाही, माझा मेळावा हा पारंपारिक मेळावा आहे, त्यांचा हा पहिला मेळावा आहे. माझ्या मेळाव्यासाठी सर्व जाती धर्माचे लोकं येणार आहेत. मात्र त्यांचा पहिलाच मेळावा असल्याने त्याकडे आमचं देखील लक्ष लागलं आहे, असं वक्तव्य भाजपच्या आमदार पंकजा मुंडे यांनी केलं आहे. भगवान भक्तीगडावर आज दुपारी पंकजा मुंडे यांचा दसरा मेळावा होत आहे. त्या आधी त्यांनी माध्यमांशी साधलेल्या संवादात हे विधान केलं आहे.

सावरगाव हे भगवान बाबा यांचे जन्म गाव आहे. तिथे आम्ही मोठ्या प्रमाणात जात त्यांचे आशीर्वाद घेतो. मी आणि धनंजय मुंडे यांनी यापूर्वी असा मेळावा घेतला नाही. ही पहिली वेळ आहे. यापूर्वी गोपीनाथ मुंडे मेळावा घेत होते, पण तेव्हा मी आणि धनंजय मुंडे खाली बसून भाषण ऐकत होतो. धनंजय मुंडे आणि मला एका मंचावर येण्याची सवय झाली आहे. 10 वर्षांपासून मेळावा घेत आहे, मेळाव्यातील माझं भाषण ऐकण्यासाठी राज्यभरातून लोकं येत असतात. माझ्या मेळाव्यासाठी सर्व जाती धर्माचे लोकं येणार आहेत. मात्र नारायण गडावर होणार मनोज जरांगे यांचा पहिलाच दसरा मेळावा आहे, त्यामुळे ते काय बोलणार याकडे आमचं देखील लक्ष लागलं आहे, असं यावेळी बोलताना पंकजा मुंडे यांनी म्हंटलं आहे.