सोलापूरच्या पंढरपूर येथील पंचायत समितीचे गट विकास अधिकारी कार्यालयात एका शेतकऱ्याने रोजगार सेवकाच्या सततच्या त्रासाला कंटाळून आयुष्य संपवण्याचा प्रयत्न केला. शेतकऱ्याला वेळीच रोखल्याने मोठा अनर्थ टळलाय. संतोष महादेव बागल असे पीडीत शेतकऱ्याचे नाव आहे.

महादेव बागल यांना महात्मा गांधी रोजगार हमीमधून विहीर मंजूर झाली होती. या कामाचे रोस्टर भरून देण्यासाठी स्थानिक रोजगार सेवकाचे पती भजनदास पवार याला तीस हजार रूपये दिले आहेत. अजून पैशांची मागणी केल्यानंतर पीडीत शेतकऱ्याने रोजगार सेवकाच्या आर्थिक त्रासाला कंटाळून गळफास घेण्याचा प्रयत्न केला. या घटनेने पंढरपूर तालुक्यात मोठी खळबळ उडाली आहे. या प्रकरणी स्थानिक शेतकऱ्यांनी रोजगार सेवक आणि तिच्या पतीवर कडक कारवाई करावी, अशी लेखी मागणी केली आहे.