यंदाच्या आषाढी वारीसाठी पंढरपूरमध्ये १२ ते १३ लाख भाविक दाखल होणार असल्याचा अंदाज व्यक्त करण्यात आला आहे. भाविकांच्या या मोठ्या लाटेसाठी मंदिर समितीने विठ्ठल रुक्मिणी प्रसादाच्या व्यवस्थेत भरघोस तयारी केली आहे.

समितीने यंदा तब्बल १३ लाख ५० हजार बुंदी लाडू आणि ६० हजार राजगिरा लाडू तयार केले असून, हे लाडू प्रसाद स्वरूपात भाविकांना अल्पदरात विक्रीसाठी उपलब्ध करून देण्यात येणार आहेत.

वारीच्या काळात दर्शन झाल्यानंतर अनेक भाविक देवाचा प्रसाद घरी नेण्यासाठी खरेदी करतात. त्यामुळे दरवर्षीप्रमाणे यंदाही प्रसादाची मागणी प्रचंड आहे. त्यामुळे भाविकांना कोणतीही अडचण भासू नये, यासाठी मंदिर समितीकडून लाडू प्रसादाची व्यवस्था करण्यात आली आहे.