Shivaji Maharaj and Tipu Sultan comparison controversy Maharashtra : काँग्रेस प्रदेशाध्यक्ष हर्षवर्धन सपकाळ यांनी छत्रपती शिवाजी महाराज आणि टिपू सुलतान यांची तुलना केल्याने महाराष्ट्रात संतापाची लाट उसळली आहे. या विधानाचा निषेध करत मराठा क्रांती मोर्चाने आक्रमक पवित्रा घेतला आहे. हर्षवर्धन सपकाळ यांचे तोंड काळे करणाऱ्याला १ लाख रुपयांचे रोख बक्षीस जाहीर केले आहे. मराठा क्रांती मोर्चाचे राज्य समन्वयक महेश डोंगरे यांनी ही घोषणा केली.

डोंगरे म्हणाले की, "सपकाळ यांनी शिवरायांचा अपमान केला आहे. त्यांनी तातडीने प्रदेशाध्यक्ष पदाचा राजीनामा देऊन महाराष्ट्राची जाहीर माफी मागावी. अन्यथा त्यांना राज्यात कुठेही फिरू दिले जाणार नाही."

यावेळी डोंगरे यांनी सपकाळ यांच्यावर जहरी टीका केली. "सपकाळ यांनी आपल्या बापाच्या नावापुढे टिपू सुलतानचे नाव लावावे आणि मग तुलना करावी," अशा शब्दात त्यांनी आपला संताप व्यक्त केला. शिवरायांच्या अपमानामुळे मराठा समाज आक्रमक झाला असून ठिकठिकाणी निदर्शने सुरू झाली आहेत. या वादाने आता राजकीय वळण घेतले असून सपकाळ यांच्या अडचणी वाढण्याची शक्यता आहे.