मावळ तालुक्यातील तळेगाव दाभाडे शहरानजीकच्या कुंडमळा या पर्यटनस्थळी रविवारी एक धक्कादायक घटना घडली. इंद्रायणी नदीवर असलेला जुना पूल अचानक कोसळल्याने परिसरात एकच खळबळ उडाली आहे. रविवार असल्याने या ठिकाणी मोठ्या प्रमाणावर पर्यटकांची गर्दी झाली होती. या दुर्घटनेत अनेक पर्यटक इंद्रायणी नदीत वाहून गेल्याची भीती व्यक्त करण्यात येत आहे. साधारण २० पर्यटक वाहून गेल्याचा अंदाज व्यक्त केला जात आहे.

घटनेची माहिती मिळताच स्थानिक पोलीस, ग्रामस्थ आणि बचावपथकाने घटनास्थळी धाव घेतली. सध्या बचावकार्य युद्धपातळीवर सुरू असून, पाण्याचा प्रवाह प्रचंड असल्यामुळे मदत कार्यात अडथळे येत आहेत. या घटनेमुळे परिसरात प्रचंड खळबळ उडाली असून, अनेकांचे नातेवाईक घटनास्थळी जमा झाले आहेत.