गुंड निलेश घायवळवरून सध्या राजकारण तापलं असून, यात आरोप प्रत्यारोपांच्या फैरी सुरू झाल्या आहेत. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी घायवळच्या भावाला शस्त्र परवाना देण्याच्या प्रकरणात दोन नेत्यांची नावं घेतली होती. त्यात भाजपच्या राम शिंदेंचंही नाव होतं. रोहित पवार यांनी आरोप केले असतानाच आता भाजपचे राम शिंदे यांच्यासोबत निलेश घायवळचा व्हिडिओ व्हायरल होत आहे.

निवडणूक प्रचारात राम शिंदे यांच्यासाठी घायवळ हा मते मागतानाचा व्हिडिओ असल्याचे सांगण्यात येत आहे. रोहित पवारांनी काही तासांपूर्वीच घायवळ प्रकरणात राम शिंदेंचे नाव घेतले होते. त्यानंतर हा व्हिडिओ सोशल मीडियावर व्हायरल झालेला आहे. या व्हिडिओत घायवळ राम शिंदे यांच्यासाठी मते मागत असल्याचे दिसून येत आहे, असे सांगितले जाते.

दरम्यान, गुंड निलेश घायवळ याला परदेशातून आणण्याच्या प्रक्रियेला पुणे पोलिसांनी सुरुवात केली आहे. घायवळ बनावट पासपोर्ट वापरून परदेशात गेला आहे, असे सांगितले जात आहे. त्याच्यावर १५ ते २० गुन्हे दाखल आहेत. आता पुणे पोलीस घायवळला परदेशातून आणणार आहेत. त्याची प्रक्रिया सुरू केली आहे. कोर्टाकडे तशी विनंती केली आहे. त्यावर कोर्ट उद्या निर्णय देणार असल्याचे समजते.