पर्यटकांसाठी आनंदाची बातमी आहे. तब्बल सात महिन्यांच्या प्रतीक्षेनंतर नेरळ-माथेरान मिनी ट्रेन पुन्हा एकदा पर्यटकांच्या सेवेत रुजू होणार आहे. मध्य रेल्वेच्या मुंबई विभागाने दिलेल्या माहितीनुसार, 'सहा नोव्हेंबरपासून ही सेवा पुन्हा सुरू करण्यात येणार आहे'. पावसाळ्याच्या काळात सुरक्षेच्या कारणास्तव मे महिन्यापासून बंद असलेली ही ऐतिहासिक ट्रेन आता पुन्हा एकदा प्रवाशांना निसर्गरम्य प्रवासाचा अनुभव देणार आहे.

विशेष म्हणजे पहिल्या गाडीत विस्टाडोम कोस्ट लावण्यात आला आहे. पर्यटकांना डोंगर द-यांमधील निसर्ग सौंदर्याचा आनंद चहू बाजूने घेता याणार आहे.मध्य रेल्वेने याबाबत अधिकृत परिपत्रक जारी केले असून, या निर्णयामुळे माथेरानच्या पर्यटनाला मोठी चालना मिळण्याची अपेक्षा आहे. पर्यटक आणि स्थानिक व्यावसायिक या दोघांनीही या निर्णयाचे स्वागत केले असून,ही सेवा सुरू झाल्याने पर्यटकांना आता थेट नेरळवरून मिनी ट्रेनने माथेरान गाठता येणार आहे.