शहापुर विधानसभा मतदारसंघात झालेल्या अटीतटीच्या निवडणुकीत महायुती राष्ट्रवादी जित पवार गटाचे उमेदवार दौलत दरोडा यांचा विजय झाला. महाविकास आघाडीचे उमेदवार पांडुरंग बरोरा यांचा १६७२ मतांनी दरोडा यांनी पराभव केला आहे. दरोडा हे पाचव्यांदा विधानसभेची निवडणूक जिंकले आहेत. विजयानंतर दौलत दरोडा यांनी साम टीव्हीवर आपली पहिली प्रतिक्रिया दिली आहे. यावेळी बोलताना दौलत दरोडा म्हणाले की, 1995 पासून मी या मतदारसंघाचं प्रतिनिधित्व करतो आहे. आत्तापर्यंत लढवलेल्या 7 निवडणुकीपैकी मी पाचवेळा विजयी झालो आहे. अजित पवार यांनी माझ्यावर विश्वास दाखवून मला यावेळी पुन्हा एकदा संधी दिली आहे. इथल्या मतदारांनी माझ्यावर जो विश्वास दाखवला आहे, त्यावर मी खरं उतरण्याचा प्रयत्न करेल. येणाऱ्या पाच वर्षात शहापूर मतदारसंघाच्या सर्वांगीण विकासासाठी मी प्रयत्नशील राहील, अशी ग्वाही देखील दरोडा यांनी यावेळी बोलताना दिली आहे.

Edited By Rakhi Rajput