नवाब मलिक यांनी अपक्ष आणि राष्ट्रवादी काँग्रेस अजित पवार गट या दोन्ही पक्षांच्या नावे आज उमेदवारी अर्ज दाखल केला असल्याची माहिती सूत्रांनी दिली आहे. मानखुर्द-शिवाजीनगर या विधानसभा मतदारसंघातून त्यांनी हे अर्ज दाखल केले आहे. तर मी कोणत्या पक्षाकडून लढणार हे ३ वाजता जाहीर करेन असं नवाब मलिक यांनी म्हंटलं आहे.

मानखुर्द-शिवाजीनगर या विधानसभा मतदारसंघातून नवाब मलिक यांना पक्षाकडून एबी फार्म मिळाल्याची माहिती समोर आली आहे. मात्र त्यांनी राष्ट्रवादी अजित पवार गट आणि अपक्ष असे दोन उमेदवारी अर्ज भरले आहेत. मानखुर्द-शिवाजीनगर या विधानसभा मतदारसंघातून शिंदेच्या शिवसेनेकडून सुरेश पाटील यांना उमेदवारी जाहीर करण्यात आली आहे. काल मुख्यमंत्र्यांच्या वर्षा या निवासस्थानी सुरेश पाटील यांना एबी फॉर्म देण्यात आला. सुरेश पाटील हे आज शिवाजीनगर-मानखुर्द या विधानसभेतून आपला उमेदवारी अर्ज भरणार आहेत. त्यामुळे नवाब मलिक हे राष्ट्रवादी काँग्रेस पक्षाकडून उमेदवारी अर्ज भरणार की अपक्ष उमेदवारी अर्ज भरणार याकडे सर्वांचे लक्ष लागले आहे. याबाबत ते उमेदवारी अर्ज भरून झाल्यावर ३ वाजता माध्यमांशी संवाद साधणार आहेत. यावेळी ते आपली भूमिका स्पष्ट करणार आहेत.

Edited By Rakhi Rajput