रीलचा नादच लय बेक्कार. काही जण रीलसाठी कुठलंही धाडस करतात. अगदी जीवाची पर्वाही करत नाहीत. असे प्रकार रोखण्यासाठी पोलीस प्रशासन प्रयत्न करत असतं. रील करताना स्टंटबाजी करणाऱ्यांवर पोलीस धडक कारवाई करतात. प्रसंगी दंडवसुलीही करतात, पण आता पोलीसच त्याच्या आहारी गेला आणि नियम मोडला तर त्याला काय म्हणावं?

नवी मुंबईतील पोलीस अधिकाऱ्यानंही रीलच्या नादात वाहतूक नियम पायदळी तुडवलेत. त्यानं आपल्या चिमुकल्या मुलीच्या हातात स्टिअरिंग दिली आणि रील तयार केली. नेरूळच्या पोलीस ठाण्यात कार्यरत असलेले पोलीस उपनिरिक्षक बिपीन तुतूरवाड यांचा निष्काळजीपणा यातून समोर आला आहे. लहान मुलीच्या हाती त्यांनी कारची स्टिअरिंग दिली आणि रील तयार केली. हा व्हिडिओ व्हायरल झाला. वाहतूक नियम सर्वसामान्यांनी मोडला तर, त्याच्यावर लगेच कारवाई होते. आता या पोलीस अधिकाऱ्यानंच वाहतूक नियम मोडला आहे. या बेजबाबदार अधिकाऱ्यावर आता कारवाई होणार का?