विकास मिरगणे, नवी मुंबई | साम टीव्ही

नवी मुंबई महापालिका उपायुक्त कैलास गायकवाड यांना लाचलुचपत प्रतिबंधक विभागाने (ACB) अटक केली. या लाचखोरीच्या प्रकरणामुळं नवी मुंबईत खळबळ उडाली आहे. गायकवाड यांना ४२ हजार रुपयांची लाच घेताना त्यांना एसीबीच्या पथकाने रंगेहाथ पकडलं.

कैलास गायकवाड कसे अडकले एसीबीच्या जाळ्यात?

नवी मुंबई महापालिकेचे उपायुक्त कैलास गायकवाड यांना ४२ हजारांची लाच घेताना एसीबीच्या अधिकाऱ्यांनी रंगेहाथ पकडले. कंत्राटदाराकडून लाच घेताना ही कारवाई केली आहे. अतिक्रमण विभागाचे बिल काढण्यासाठी पैशांची मागणी केल्याची तक्रार त्यांनी केली होती. १५ नोव्हेंबर २०२४ ते १५ फेब्रुवारी २०२५ या कालावधीत ऐरोली विभागात केलेल्या कामाचा मोबदला देण्यासाठी लाचेची मागणी केल्याचा आरोप आहे. तक्रारीनंतर सापळा रचून एसीबी पथकाकडून त्यांना अटक करण्यात आली. नवी मुंबई महापालिकेच्या मुख्यालयातील तिसऱ्या मजल्यावरील कार्यालयातच पथकाने सापळा रचला होता. गायकवाड यांना ताब्यात घेऊन त्यांची चौकशी करण्यात येत आहे.