नाशिकमधून धक्कादायक बातमी हाती आली आहे. नाशिकच्या मेडिकल कॉलेजमध्ये महिला कर्मचाऱ्याच्या अंगावर लिफ्ट कोसळल्याची घटना घडली आहे. या घटनेत मेडिकल कॉलेजमधील महिला कर्मचारी गंभीर जखमी झाली असून जखमी महिलेवर उपचार सुरू आहेत. ज्योती अहिरे असे गंभीर जखमी झालेल्या महिला कर्मचाऱ्याचे नाव आहे.

दैनंदिन काम करत असताना लिफ्ट महिलेच्या अंगावर कोसळल्याची प्राथमिक माहिती आहे. लिफ्ट कोसळल्यानंतर घटनास्थळी तातडीने मुलांनी धाव घेतली. घटनास्थळावरील परिस्थिती बघून मुलांनी आक्रोश केला. मेडिकल कॉलेज प्रशासनाकडून अद्याप कोणतीही अधिकृत माहिती देण्यात आलेली नाही. या प्रकरणी आडगाव पोलिसांकडून चौकशी सुरू करण्यात आली आहे. मेडिकल कॉलेजमधील या घटनेने संपूर्ण शहरात खळबळ उडाली आहे.