नाशिक शहरासह जिल्ह्यात अनेक ठिकाणी विजांच्या कडकडाटासह मुसळधार पाऊस कोसळला. तब्बल तासभर झालेल्या पावसामुळं सर्वांचीच दाणादाण उडाली. नाशिक शहरातील रस्ते जलमय झाले होते. आठवडाभराच्या विश्रांतीनंतर नाशिकमध्ये पावसानं जोरदार हजेरी लावली. सिडको, गोविंद नगर, कॉलेज रोड, गंगापूर रोड, पाथर्डी परिसरात मुसळधार पाऊस बरसला. मुसळधार पावसामुळे भुयारी गटार ओव्हरफ्लो झाल्यानं पाणी थेट गोदावरी नदीपात्रात घुसलं.

मुसळधार पावसाचं पाणी नाशिकच्या बाजारपेठांमध्ये घुसलं. यामुळं रक्षाबंधनाच्या दिवशी खरेदीसाठी आलेल्या नागरिकांची तारांबळ उडाली. सराफा बाजार, हुंडीवाला लेन, दहिपुलासह जुन्या नाशिकमध्ये रस्त्यांना नदीचं स्वरूप आलं होतं. मुंबई-नाशिक महामार्गावर मुंबई नाका, गोविंद नगर परिसरातील रस्ता पाण्याखाली गेला होता.