नंदुरबार जिल्ह्यातील नर्मदा नदीच्या काठावर वसलेल्या धडगाव तालुक्यातील दुर्गम सावऱ्यादिगर गावातून एका आदिवासी सरपंचाचं फिल्मी स्टाईलने अपहरण करण्यात आल्याचा धक्कादायक प्रकार समोर आला आहे. ऊसतोड ठेकेदारांनी आपले अडकलेले पैसे काढण्यासाठी थेट सरपंचालाच लक्ष्य केलं. सरपंच दिलीप पावरा यांचे हातपाय बांधून त्यांना तब्बल आठशे किलोमीटर दूर नेत एका गोठ्यात डांबून ठेवण्यात आलं होतं. मात्र, धडगाव पोलीस आणि आदिवासी जनजागृती टीमच्या सतर्कतेमुळे अवघ्या २४ तासांत त्यांची सुखरूप सुटका करण्यात यश आलं असून, या घटनेमुळे संपूर्ण जिल्ह्यात खळबळ उडाली आहे. सरपंच संतोष देशमुख हत्येसारखा हा कट होता का? असा सवाल आता उपस्थित होत असून नागरिकांमध्ये भीतीचे वातावरण पसरले आहे.