Hindi Marathi Language Clash in Mumbai Local: नालासोपारा रेल्वे स्थानकातून मुंबईच्या दिशेने जाणाऱ्या ट्रेनमध्ये मराठी आणि हिंदी भाषेचा दोन तरुणांमध्ये वाद झाल्याचा व्हिडिओ सोशल मीडियावर व्हायरल झाला आहे. हा वाद ट्रेनमध्ये उभे राहण्यावरून निर्माण झाला असल्याचे व्हिडिओमध्ये बोलले जात आहे. व्हिडिओ काढणारा तरुण हा नालासोपारा शहरात राहणार असल्याचे त्याने व्हिडिओमध्ये म्हटले आहे.

नालासोपारा येथील लोकल ट्रेनमध्ये मराठी आणि अमराठी प्रवाशांमध्ये वाद झाल्याची घटना समोर आली आहे. ट्रेनमध्ये उभे राहण्याच्या जागेवरून सुरू झालेला हा वाद थेट भाषेवर पोहोचला. ज्याचा व्हिडिओ सध्या सोशल मीडियावर व्हायरल होत आहे. एका प्रवाशाने दुसऱ्याला, 'मराठी का नाही येतं? याचं मला उत्तर दे?' असा जाब विचारल्याचे या व्हिडिओमध्ये दिसत आहे. यानंतर दोघांमध्ये शाब्दिक चकमक झाली आणि 'मला हात लावायचा नाही' असे एक प्रवासी म्हणत असतानाही वाद वाढत गेल्याचे दिसून येते. हा संपूर्ण प्रकार कॅमेऱ्यात कैद झाला असून, मुंबईच्या लोकल ट्रेनमधील भाषिक वादाचा मुद्दा पुन्हा एकदा चर्चेत आला आहे.