नागपूर दंगलीचा मास्टर माईंड फहीम खानविरोधात मोठी कारवाई करण्यात आली आहे. फहीम खानच्या घरावर महानगर पालिकेकडून बुलडोझर चालवण्यात आला. सकाळी १० वाजता मनपाने तोड काम कारवाईला सुरूवात केली. फहीम खानचे नागपूरच्या टेकानाका परिसरात घर असून या घराचा काही भाग अतिक्रमण करून वाढवण्यात आला होता. या अतिक्रमणाविरोधात कारवाई करण्यात आली आहे. नागपूर महानगर पालिकेने या अनधिकृत अतिक्रमणाविरोधात फहीम खानच्या कुटुंबीयांना नोटीस बजावली होती. त्यानंतर पालिकेकडून या तोडकाम मोहिमेला सुरूवात करण्यात आली.

मनपा कारवाईच्या पार्श्वभूमीवर यशोधरानगर परिसरात मोठा पोलिस बंदोबस्त तैनात करण्यात आला आहे. स्थानिक पोलिस, एसआरपीएफच्या दोन तुकड्या परिसरात तैनात करण्यात आल्या आहेत. तसेच इतर पोलिस स्टेशनकडून मोठा पोलिस बंदोबस्त लावण्यात आला आहे. फहीम खानच्या घरासमोरच टीनाचे शेड तोडण्यात आले आहे. तसेच वॉल कंपाऊंड सुद्धा तोडण्यात आले आहे. विद्युत पुरवठा खंडित करून दोन जेसीबी आणि एक पोकलँडच्या सहाय्याने फहीम खानचे घर पाडण्यात येत आहे. ही कारवाई बरेच तास चालणार आहे. या कारवाईमुळे आजूबाजूचे सर्वच रस्ते बंद करण्यात आले आहेत.