मुंबई : मुंबईतील भुयारी मेट्रो सेवा अचानक खोळंबल्याची घटना समोर आली आहे. कफ परेडच्या दिशेने जाणाऱ्या मेट्रोचे दरवाजे बंद न झाल्यामुळे मेट्रो सेवा थांबवण्यात आली. ही घटना सीएसएमटी स्थानकावर घडल्याची प्राथमिक माहिती आहे.मिळालेल्या माहितीनुसार, कफ परेडला जाणारी मेट्रो स्थानकावर उभी असताना प्रवाशी मेट्रोत बसले होते. मात्र, मेट्रोचे दरवाजे सतत उघड-बंद होत असल्याने तांत्रिक बिघाड झाल्याचा संशय व्यक्त केला जात आहे. दरवाजे बंद न झाल्यामुळे मेट्रो जागीच थांबवण्यात आली.

या अचानक झालेल्या बिघाडामुळे मेट्रोतील प्रवाशांना बराच वेळ ताटकळत बसावे लागले. परिणामी, प्रवाशांमध्ये नाराजीचे वातावरण निर्माण झाले असून अनेकांना उशीराचा सामना करावा लागला. दरम्यान, तांत्रिक पथकाकडून बिघाड दुरुस्त करण्याचे काम सुरू असल्याची माहिती असून, मेट्रो सेवा सुरळीत करण्यासाठी प्रयत्न सुरू असल्याचे प्रशासनाकडून सांगण्यात आले आहे.