मुंबईत सुरु असलेल्या मुसळधार पावसाचा फटका रेल्वेनंतर आता मोनोरेलला बसला आहे. वडाळा मार्गावर धावणारी मोनोरेल तांत्रिक कारणामुळे आज पुन्हा बंद पडली. अचानक मोनोरेल बंद पडल्यानंतर प्रवाशांना मोठा त्रास सहन करावा लागला. तातडीने बंद पडलेल्या मोनोरेलमधून प्रवाशांना सुरक्षितरीत्या बाहेर काढून दुसऱ्या मोनोरेलमध्ये शिफ्ट करण्यात आलं. सध्या कपलिंग करून बंद पडलेली मोनोरेल कारशेडकडे नेली जात असून तेथे तांत्रिक बिघाड दुरुस्त केला जाणार आहे. मुंबई मोनोरेलमध्ये महिन्याभरात तिसऱ्यांदा तांत्रिक अडचण निर्माण झाली आहे. त्यामुळे प्रवाशांमध्ये नाराजी व्यक्त होत आहे. वारंवार बिघाडांमुळे मोनोरेल सेवांवर आता प्रश्नचिन्ह उपस्थित झाले आहे.