हार्बर रेल्वे मार्गावरील वाहतूक ठप्प झाली. नवी मुंबईतील खारघर रेल्वे स्थानकावर ओव्हरहेड वायरमध्ये शॉर्टसर्किट झाला. लोकल रेल्वे स्थानकावर येताच ओव्हर हेड वायरमध्ये शॉर्टसर्किट होऊन धूर येऊ लागला. त्यामुळे या लोकलमध्ये असलेले प्रवासी प्रचंड घाबरले. या घटनेमुळे प्रवाशांची पळापळ झाली.

या घटनेनंतर खबरदारी म्हणून खारघरहून सीएसटी आणि ठाण्याच्या दिशेने जाणारी लोकल वाहतूक थांबवण्यात आली आहे. या घटनेत कोणतीही दुखापत झालेली नाही मात्र अचानक रेल्वे सेवा थांबल्याने प्रवाशांमध्ये भीतीचे वातावरण निर्माण झाले आहे. लोकल वाहतूक ठप्प झाल्यामुळे ठाण्यावरून आणि मुंबईवरून खारघरच्या दिशेने येणाऱ्या प्रवाशांचे हाल झाले आहे. रेल्वे प्रशासनाने घटनास्थळी धाव घेतली असून दुरूस्तीचे काम सुरू आहे. लोकलसेवा लवकरच पूर्वपदावर येईल, असे त्यांनी सांगितले.