मुंबईत गेल्या २ दिवसांपासून पडणाऱ्या मुसळधार पावासामुळे मुंबईकरांचे चांगलेच हाल होत आहे. सतत पडणाऱ्या या पावसामुळे अनेक सखल भाग पाण्याखाली गेले आहेत. मुंबईतल्या सांताक्रुज पूर्व परिसरात असणारे वाकोला पोलिस ठाणे देखील पाण्याखाली गेले आहे. पोलिस ठाण्यात पाणी शिरल्यामुळे पोलिसांची चांगलीच तारांबळ उडाली.

यासोबतच त्या ठिकाणी असणाऱ्या आनंद नगर परिसरातील शेकडो बाईक, रिक्षा आणि महागड्या चारचाकी गाड्या देखील पाण्यामध्ये बुडाल्याचे चित्र पाहायला मिळत आहे. यामुळे परिसरातील नागरिकांचे मोठे नुकसान देखील झाले आहे. अशात मुंबईसाठी पुढचे काही तास खूप महत्वाचे असणार आहे. कारण मुंबईत मुसळधार पाऊस पडण्याची शक्यता आहे. त्यामुळे नागरिकांनी काळजी घ्यावी आणि सतर्क राहावे असे आवाहन पालिका प्रशासनाकडून करण्यात येत आहे.