मुंबईतील दहीहंडी उत्सवात यंदा एक अनोखा रंग पाहायला मिळाला. बोरिवलीमध्ये आमदार प्रकाश सुर्वे यांनी आयोजित केलेल्या भव्य दहीहंडी उत्सवात थेट पंतप्रधान नरेंद्र मोदी यांच्यासारखा हुबेहूब पोशाख परिधान केलेल्या व्यक्तीने हजेरी लावल्याने उपस्थित नागरिक आणि गोविंदांचे लक्ष वेधून घेतले. या व्यक्तीने केवळ पंतप्रधान मोदी यांच्यासारखा पेहरावच केला नव्हता, तर त्यांचा आवाज आणि बोलण्याच्या शैलीचीही हुबेहूब नक्कल केली. यावेळी त्यांनी उपस्थितांशी संवाद साधत 'ऑपरेशन सिंदूर'बाबत माहिती दिली. त्यांची बोलण्याची शैली आणि हुबेहूब संवाद साधण्याची पद्धत पाहून दहीहंडीच्या ठिकाणी उपस्थित प्रेक्षकांमध्ये मोठा उत्साह पाहायला मिळाला.