संजय गडदे, साम टीव्ही

मुंबई: अंधेरी पश्चिम येथील गिल्बर्ट हिल रोडलगतच्या जंगल परिसरात सोमवारी दुपारी एक दुर्दैवी घटना घडली. 8 वर्षीय मुलगा पाण्यात बुडाल्याची माहिती समोर आली आहे. प्राथमिक माहितीनुसार, 3 ते 4 मित्र जंगलातील पाणीसाठ्यात अंघोळ करण्यासाठी गेले होते. त्यावेळी हा मुलगा पाण्यात बुडाला.

घटनेची माहिती मिळताच डी.एन. नगर पोलिस आणि मुंबई अग्निशमन दलाचे जवान तातडीने घटनास्थळी दाखल झाले. बेपत्ता मुलाचा शोध घेण्यासाठी युद्धपातळीवर शोधमोहीम सुरू करण्यात आली असून, बचाव पथकाकडून परिसराची कसून तपासणी सुरू आहे. दरम्यान, या घटनेमुळे परिसरात हळहळ व्यक्त होत असून पोलिसांकडून घटनेचा अधिक तपास सुरू आहे. पावसाळ्यात जंगल परिसर, नैसर्गिक जलसाठे आणि पाण्याने भरलेल्या धोकादायक ठिकाणी मुलांना जाऊ न देण्याचे आवाहन प्रशासन आणि स्थानिकांकडून करण्यात आले आहे. अधिकृत माहितीची प्रतीक्षा असून शोधमोहीम अद्याप सुरू आहे.