अखेर पापाचा घडा भरला आणि निवडणूक आयोगालाच लाज वाटली असेल हे जर फार काळ प्रकरण टिकवलं तर निवडणूक आयोगाची उरलीसुरली इज्जतसुद्धा धुळीस मिळेल म्हणून अखेर देवेंद्र फडणवीस यांच्या लाडक्या ताई यांना राज्याच्या पोलीस महासंचालक पदावरून हटवण्यात आलं, अशी टीका शिवसेना उद्धव ठाकरे गटाचे खासदार संजय राऊत यांनी रश्मी शुक्ला यांच्या बदलीनंतर केली आहे. मंगळवारी सकाळी प्रसारमाध्यमांशी संवाद साधताना त्यांनी महायुती सरकार आणि भाजपवर टीकास्त्र डागलं.

पुढे बोलताना राऊत यांनी, हे सरकार बेकायदेशीर आहे, 'त्यामुळे त्यांनी अनेक नेमणुका बेकायदेशीरपणे करून घेतल्या आहेत. जो अधिकारी तुरुंगात जाण्याच्या तयारीत होता त्या अधिकारावरील गुन्हे सरकार बदलताच काढून त्यांना थेट राज्याच्या पोलिस महासंचालक पदाची जागा देण्यात आली आणि त्यांच्याकडून अनेक गैर्यकृत्य राजकीय करून घेतले' असल्याचं म्हंटलं आहे. 'सत्ताधाऱ्यांच्या पैशांच्या गाड्या आजही सोडल्या जात आहेत. अधिकृत सरकारच्या गाड्यांच्या माध्यमातून पैशांचे वाटप आणि पोहोचवणं सुरू आहे. रस्त्यावर सामान्य नागरिकांना त्रास दिला जात आहे. महिलांच्या पर्स उघडून पाहिले जात आहे आणि निवडणूक आयोगाचे ऑब्जर्वस आलेले आहेत ते मूग घेऊन बसले आहेत, अशी टीका देखील राऊत यांनी केली आहे.

Edited By Rakhi Rajput