Mother breaks down in tears as Dharashiv rains flood home with mud : मागील दोन दिवसांपासून धाराशिवमध्ये पावसाने हाहाकार माजवलाय. आभाळ फाटल्यागत पाऊस पडला अन् अनेक संसार उघड्यावर पडले. नदी-नाल्याला पूर आले आहेत, त्यामुळे अनेकांच्या घरात पाणी शिरलेय. धाराशिवमधील आंबी गावातील घरात पुराचं पाणी शिरलंय. मुकेश गटकळ यांच्या घरात पाणी शिरलंय...त्यामुळे घरातील साहित्याचं प्रचंड नुकसान झालंय. संसार उघड्यावर पडल्यामुळे महिलांच्या डोळ्यात अश्रू आलेत.

मुकेश गटकळ यांच्या घरात पुराचे पाणी घुसल्याने सर्वत्र चिखल झालाय. त्यांच्या घरातील सामान पाण्यामुळे अन् चिखलामुळे अस्ताव्यस्त अवस्थेत पडल्याचे कॅमेऱ्यात दिसतेय. मुलांच्या वह्या-पुस्तकेही पाण्यात भिजली आहेत. सगळ्या घरात चिखलाचा खच साचलाय, त्यामुळे काय खायचं असा प्रश्न त्यांच्या डोळ्यासमोर उभा राहिलाय. मायबाप सरकारनेच आता आम्हाला मदत करावी, असं आवाहन गटकळ कुटुंबियांनी केलं आहे. घरातील परिस्थिती सांगताना मिसेस गटकळ यांच्या अश्रूचा बांध फुटला...