विधिमंडळाच्या पावसाळी अधिवेशनात आज काळिमा फासणारी घटना घडली. विधिमंडळाच्या लॉबीमध्ये भाजप आमदार गोपीचंद पडळकर आणि शरद पवार गटाचे नेते जितेंद्र आव्हाड यांचे कार्यकर्ते भिडले. या घटनेचा दुसरा व्हिडीओ समोर आला आहे. यामध्ये दोन्ही नेत्यांचे कार्यकर्ते कसे एकमेकांना मारत आहेत हे दिसत आहे. या व्हिडीओतून पहिला हात कुणाच्या कार्यकर्त्यांनी उचलला हे देखील दिसत आहे. जितेंद्र आव्हाड यांनी गोपीचंद पडळकर यांच्या कार्यकर्त्यांनी पहिला हात उचलला असल्याचे सांगितले. तर गोपीचंद पडळकर यांनी नेमकं काय झालं माहिती नाही असे सांगून तिथून निघून गेले.

गोपीचंद पडळकर आणि जितेंद्र आव्हाड हे काल विधानभवनाच्या गेटवर आमने सामने आले होते. त्यांनी एकमेकांना शिवीगाळ केला होता. याचा व्हिडीओ देखील समोर आला होता. या वादाचे पडसाद आज पुन्हा विधीमंडळाच्या लॉबीमध्ये पाहायला मिळाले. या दोन्ही नेत्यांचे कार्यकर्त्यांनी एकमेकांना मारहाण केली. यावरून आता राजकीय वर्तुळात चर्चांना उधाण आले आहे. नेमकं काय घडलं याचा अहवाल मागितला आहे. अहवाल आल्यानंतर योग्य ती कारवाई केली जाईल, असे विधानसभा अध्यक्ष नार्वेकर यांनी सांगितले.