मयूर राणे, साम टीव्ही

मुंबईमध्ये झालेल्या अवकाळी पावसाने मुंबईच्या नालेसफाईची पोलखोल केली आहे. दरवर्षी कोट्यवधी रुपये हे पालिका प्रशासनाला मिळत असतात. मात्र, तरीदेखील दरवर्षी ही परिस्थिति जैसे थे असते. यामुळे अनेक साथीचे रोग होऊ शकता. तरी देखील पालिका प्रशासन हे झोपा काढत असल्याचे चित्र आहे.

या नाले सफाईच्या विरोधात आज महाराष्ट्र नवनिर्माण सेनेने साकीनाक्यातील नाल्यात उतरून फुटबॉल फेकाफेकी करीत अनोखे आंदोलन केले. साकीनाक्यातील सत्यनगर येथील नाल्यात इतक्या मोठ्या प्रमाणात कचरा साचला आहे की त्यात मनसेचे विभाग अध्यक्ष महेंद्र भानुशाली आणि इतर पदाधिकारी उतरले आणि त्यांनी या नाल्यात फुटबॉल हातात घेऊन बॉल फेकाफेकी चा खेळ खेळला. पालिका प्रशासन, कंत्राटदार आणि लोकप्रतिनिधी ज्या पद्धतीने नालेसफाई बाबत जबाबदारीची एकमेकांकडे फेकाफेकी करीत जबाबदारी झटकत आहे, त्याचे प्रतीक म्हणून अश्या कचऱ्याने भरलेल्या नाल्यात बॉल फेकाफेकी करीत त्यांना जाग आणण्याचा प्रयत्न करीत आहोत आणि तरी जाग नाही आली तर हाच कचरा पालिकेच्या कार्यालयात नेवून टाकू असा इशारा मनसेचे विभाग अध्यक्ष महेंद्र भानुशाली यांनी दिली आहे.