शिवरायांच्या राजधानीमध्ये म्हणजेच रायगडमध्ये सर्वात जास्त लेडीज बार कसे उभे राहतात, या मनसे प्रमुख राज ठाकरेंच्या व्यक्तव्यानंतर शनिवारी रात्रीच मनसे नेते योगेश चिले यांच्या नेतृत्वात मनसैनिकाकडून कोन येथील नाइट रायडर्स बारमध्ये तोडफोड करण्यात आली. लाठ्या-काठ्यांसह दगडांनी काचा फोडल्याप्रकरणी पनवेल तालुका पोलीस ठाण्यात रविवारी 15 ते 20 मनसेच्या कार्यकर्त्यांवर गुन्हा दाखल करण्यात आला होता.

यानंतर आज योगेश चिले यांच्यासह 8 जणांना पनवेल न्यायालयाकडून जामीन मंजूर करण्यात आलेला आहे. जामीन मंजूर झाल्यानंतर मनसे नेते योगेश चिले आणि गजानन काळे प्रतिक्रिया देत म्हणाले, नवी मुंबई आणि पनवेलमधील डान्सबारबाबत आम्ही नवी मुंबई पोलीस आयुक्तांना निवेदन देणार आहोत. 15 दिवसाची ही वेळ असणार त्यानंतर आम्ही धडकपणे कारवाई पनवेल, नवी मुंबई शहरात करणार आहोत, पनवेल आणि नवी मुंबईमधील डान्सबार बंद झाले पाहिजे. नवी मुंबई आणि पनवेल जे राजकारणी आहेत त्यांच्याच आशीर्वादामुळे हे सर्व डान्सबार सुरू आहेत असा ही आरोप यावेळी त्यांनी केला.