नगरपरिषद आणि नगरपंचायत निवडणुकांसाठी आज मतदान पार पडत असताना हिंगोलीतील कळमुनरी येथे शिवसेना शिंदे गटाचे आमदार संतोष बांगर मोठ्या वादात सापडले आहेत. मतदान केंद्रातच मतदानाच्या गोपनीयतेचा भंग आणि आचारसंहितेचे उल्लंघन केल्याचा गंभीर आरोप त्यांच्यावर झाला असून या संपूर्ण प्रकारचा व्हिडिओ सोशल मीडियावर व्हायरल झाला आहे. या प्रकरणात मुख्यमंत्री देवेंद्र फडणवीस यांनीही संतोष बांगरांना कडक शब्दात सुनावले आहे. या सर्व प्रकरणाची निवडणूक आयोगाने गंभीर दखल घेत त्यांच्यावर गुन्हा दाखल केला आहे. हिंगोली येथील मंगळवारी बाजार परिसरातील मतदान केंद्र क्रमांक ३ येथे सकाळी संतोष बांगर मतदानासाठी गेले असता. तेव्हा त्यांनी महिला मतदाराला ईव्हीएमवर बटन दाबण्याबाबत सांगितले. तसेच मतदान केंद्रात स्वर्गीय बाळासाहेब ठाकरेंचा विजय असो आणि एकनाथ शिंदे आगे बढ़ो हम तुम्हारे साथ हैं अशी घोषणाबाजी केली. मोबाइल फोनचा देखील वापर केला.