नरहरी झिरवळ गत काही दिवसांपासून आदिवासी समाजाच्या न्याय हक्कांसाठी आक्रमकपणे आंदोलन करत आहेत. या प्रकरणी दोनवेळा मुख्यमंत्री एकनाथ शिंदे यांची भेटही घेतली होती. अनुसूचित जमातीच्या आरक्षणाला कोणताही धक्का लागू नये. याशिवाय आदिवासींची पेसा कायद्यांतर्गत भरती करण्याचीही मागणी त्यांनी केली आहे. त्यासाठी त्यांनी शुक्रवारी मंत्रालयात मुख्यमंत्री एकनाथ शिंदे यांची भेट घेतली. मात्र मुख्यमंत्र्यांनी त्यांना वेळ दिला नाही. सतत मुख्यमंत्र्यांकडून अशा प्रकारे टोलवाटोलवी केली जात असल्याने झिरवळ यांनी आक्रमक पवित्र घेत मंत्रालयाच्या तिसऱ्या मजल्यावरून उडी मारली आहे. त्यामुळे एकच गोंधळ उडाला.

नरहरी झिरवळ यांच्यासह हिरामण खोसकर यांनीही उडी मारली. त्यानंतर त्यांनी आदिवासी समाजाच्या समर्थनार्थ जोरदार घोषणाबाजी केली. या अनपेक्षितपणे घडलेल्या प्रकारामुळे मंत्रालयात एकच हल्लकल्लोळ माजला. त्यानंतर पोलिसांनी झिरवळ व त्यांच्या सहकाऱ्यांना जाळीवरून सुरक्षित बाहेर काढले. मात्र या सर्व गदारोळात झिरवळ यांच्या मानेला दुखापत झाल्याचेही सांगण्यात येत आहे. तसच त्यांचा बीपी देखील वाढला आहे. त्यांच्यासाठी डॉक्टरांची तुकडी मंत्रालयात दाखल झाली आहे.