मंत्री हसन मुश्रीफ यांनी समरजित घाटगे यांच्यावर निशाणा साधला आहे. ''मी पवारांना गुरुदक्षिणा दिली, मात्र त्यांनी फडणवीसांच्या पाठीत खंजीर खुपसलं. या प्रवृत्तीमुळेच मला पवारांना सोडण्याची वेळ आली.'' असं म्हणत मुश्रीफांनी घाटगे यांच्यावर हल्लाबोल केला आहे.

ज्येष्ठ नेते शरद पवार यांनी 'त्यांना' मुलासारखे प्रेम दिले. खासदार सुप्रिया सुळे या मोठे भाऊ मानून 'त्यांना' राखी बांधायच्या. ईडीपासून सुटका आणि आयुष्यभर न मिळालेल्या पालकमंत्री पदासाठी 'त्यांनी' या विश्वासाचा सौदा केला. त्यामुळे 'त्यांना' आता झोप येत नाही. यातून वैफल्यग्रस्त झाल्याने त्यांच्याकडून चुकीची वक्तव्ये येत आहेत. अशी टीका शरदचंद्र पवार पक्षाचे नेते व शाहू ग्रुपचे अध्यक्ष समरजितसिंह घाटगे यांनी पालकमंत्री हसन मुश्रीफ यांच्यावर नाव न घेता केली होती. त्यावर आता हसन मुश्रीफ यांनी देखील समरजितसिंह घाटगे यांच्यावर टीकास्त्र डागलं आहे. मी पवारांना गुरुदक्षिणा दिली, मात्र त्यांनी फडणवीसांच्या पाठीत खंजीर खुपसलं. या प्रवृत्तीमुळेच मला पवारांना सोडण्याची वेळ आली, असं मुश्रीफ यांनी म्हंटल आहे.