हिंगोलीमध्ये राज्याचे शालेय शिक्षण मंत्री दादा भुसे आज शेतकऱ्यांच्या नुकसानग्रस्त भागातील पाहणी करण्यासाठी आले होते. यावेळी औंढा तालुक्यातील वसई गावचे शेतकरी प्रताप मगर यांनी बँक व्यवस्थापनाने बचत खात्याला होल्ड लावला असून पीक कर्ज भरल्याशिवाय बचत खात्यातील रक्कम देणार नसल्याची कैफियत दादा भुसे यांच्याकडे मांडली. यावरती संतप्त झालेल्या दादा भुसे यांनी बँक अधिकाऱ्याला फोन करत पाच मिनिटाच्या आत शेतकऱ्याच्या बचत खात्याला लावलेला होल्ड काढा अन्यथा स्वतः आपण बँकेत येऊ असा दम बँक अधिकाऱ्याला दिला. त्यानंतर तातडीने बँकेच्या अधिकाऱ्यांनी शेतकरी प्रताप मगर यांच्या बचत खात्याला लावलेला होल्ड काढत शेतकऱ्याची रक्कम त्याला दिली आहे.

धक्कादायक म्हणजे या शेतकऱ्याचा भाऊ रुग्णालयामध्ये भरती आहे आणि त्याच्या भावाला लागणारी रक्कम काढण्यासाठी तो हिंगोलीच्या युनियन बँकेत गेला होता. तिथे मात्र बँक अधिकाऱ्यांनी तुमच्याकडे खरीप हंगामातील पेरणीसाठी काढलेले थकीत कर्ज बाकी आहे. त्यामुळे तुमचे सर्व पैसे होल्ड केल्याची माहिती दिली त्यानंतर अस्वस्थ झालेल्या शेतकऱ्याने मंत्री दादा भुसे यांची भेट घेत त्यांच्याकडे तक्रार मांडली, आणि त्यानंतर मंत्री दादा भुसे संतप्त झाले, दादा भुसे यांनी साम टीव्ही च्या प्रतिनिधी सह शेतकऱ्यांना स्वतःच्या गाडीमध्ये बसून बँकेकडे धाव घेतली. मात्र, मध्येच बँक अधिकाऱ्यांनी होल्ड काढला आहे अशी माहिती दिल्यानंतर दादा भुसे यांनी आपला ताफा पुन्हा पुढील दौऱ्याकडे वळवला.