पुणे आणि परिसरात झालेल्या मुसळधार पावसामुळे मुंबई-पुणे एक्सप्रेसवेवरील बाणेर-म्हाळुंगे परिसराजवळ प्रचंड वाहतूक कोंडी झाली आहे. सतत कोसळणाऱ्या पावसामुळे रस्त्यांवरील वाहनांचा वेग कमालीचा मंदावला होता, महामार्गावर वाहनांच्या लांबच लांब रांगा लागल्या होत्या यामुळे दैनंदिन प्रवास करणारे हजारो नागरिक गेल्या अनेक तासांपासून वाहतूक कोंडीत अडकून पडले होते. गर्दीच्या वेळेत झालेल्या या वाहतूक कोंडीमुळे कार्यालयात जाणारे कर्मचारी, हिंजवडी आणि परिसरातील आयटी (IT) व्यावसायिक तसेच नियमित प्रवास करणाऱ्या प्रवाशांचे हाल झाले. कामावर जाणाऱ्या आणि घरी परतणाऱ्या नागरिकांना तासनतास एकाच ठिकाणी उभे राहावे लागल्यामुळे प्रवाशांमध्ये तीव्र संताप व्यक्त होत आहे.