मुंबईतील घाटकोपर येथे उच्चभ्रू इमारतीला आग लागल्याची घटना घडली आहे. इमारतीमध्ये अनेक लोक अडकल्याची माहिती मिळत आहे. याबाबत अधिक माहिती अशी की, घाटकोपर परिसरातील गोल्ड क्रश इमारतीला अचानक भीषण आग लागली आहे. या आगीत काही नागरिक इमारतीत अडकले असल्याची प्राथमिक माहिती समोर आली आहे. घटनेची माहिती मिळताच अग्निशमन दलाच्या अनेक गाड्या घटनास्थळी दाखल झाल्या असून, बचाव आणि आग विझवण्याचे प्रयत्न युद्धपातळीवर सुरू आहेत.

स्थानिक पोलिस आणि अग्निशमन दलाचे जवान इमारतीतील रहिवाशांना सुरक्षित बाहेर काढण्याचे प्रयत्न करत आहेत. आगीचे नेमके कारण अद्याप समजू शकलेले नाही. घटनास्थळी मोठी गर्दी जमली असून परिसरात गोंधळाचे वातावरण निर्माण झाले आहे. सुदैवाने आतापर्यंत कोणतीही जीवितहानी झाल्याची माहिती समोर आलेली नाही. मात्र, आगीचा फैलाव आणि धुराचा प्रचंड लोट यामुळे रहिवाशांना अडचणींना सामोरे जावे लागत आहे.