पावसाळ्याच्या आगमनानंतर पर्यटकांच्या लाडक्या ठिकाणांपैकी एक असलेल्या लोणावळ्याच्या भुशी डॅमवर पर्यटकांची मोठी गर्दी झाली आहे. रविवारची सुट्टी आणि पावसाळी वातावरणाचा मनमुराद आनंद घेण्यासाठी राज्याच्या विविध भागांतून पर्यटक लोणावळ्याला दाखल झाले आहेत.

भुशी डॅम परिसरात निसर्गसौंदर्य, धबधबे, आणि थंड हवामान यामुळे पर्यटक आनंद घेताना दिसत आहे. त्यामुळे डॅम परिसरात सकाळपासूनच मोठी वर्दळ दिसून येत आहे. विशेषतः तरुणाईसह कुटुंब मोठ्या संख्येने येथे उपस्थित आहेत. दरम्यान, पर्यटकांची वाढती संख्या लक्षात घेता वाहतूक कोंडीचंही चित्र काही भागांत दिसून येत आहे. डॅमकडे जाणाऱ्या मुख्य रस्त्यांवर वाहनांची रांग लागल्याचं चित्र आहे. पोलिस आणि स्थानिक प्रशासनाकडून गर्दी नियंत्रणासाठी अतिरिक्त बंदोबस्त तैनात करण्यात आला आहे.