मराठा समाजाला हैद्राबाद गॅझेटनुसार कुणबी प्रमाणपत्र देण्याचा अध्यादेश सरकारने जाहीर केल्यानंतर आंतरवली सराटी येथे मनोज जरांगे पाटील यांचे जंगी स्वागत करण्यात आले. या वेळी त्यांनी दलित, मुस्लिम, आदिवासी, जैन, मारवाडी, मायक्रो ओबीसी यांसह इतर समाजघटकांनी या लढाईत दिलेल्या पाठिंब्याबद्दल आभार मानले. विशेषत: पत्रकारांनी समाजाची बाजू ठामपणे मांडल्याबद्दल त्यांनी आभार मानले.

जरांगे म्हणाले, आमच्या आई-बहिणींना मारहाण झाली, गोळ्या झाडल्या गेल्या तरी लोक मागे हटले नाहीत. त्या ताकदीमुळेच ही लढाई यशस्वी झाली. लढाईला मिळालेल्या या यशामुळे आंतरवली सराटीत दिवाळी साजरी करण्यात आली. गावभर गुलालाची उधळण झाली, जेसीबीवरून जरांगे यांच्यावर गुलाल वर्षाव करण्यात आला. मराठ्यांनी ९६ टक्के लढाई जिंकली आहे, असा आनंद त्यांनी व्यक्त केला.