मराठा आंदोलक मनोज जरांगे पाटील यांनी पुन्हा एकदा मराठा आरक्षणासाठी मुंबई गाठण्याचा इशारा दिलाय. 29 ऑगस्ट रोजी मुंबईमध्ये मनोज जरांगे पाटील हे मराठा आरक्षणासाठी आमरण उपोषण करणार आहेत. मनोज जरांगे पाटील यांच्यासोबतच राज्यभरातील मराठा समाज मुंबईकडे रवाना होणार आहेत. मुंबई येथील होणाऱ्या आंदोलनाच्या संदर्भात नांदेड जिल्ह्यात देखील जोरदार तयारी सुरू आहे.

मुंबई येथे आमरण उपोषणास बसणाऱ्या मनोज जरांगे पाटील यांना पाठिंबा देण्यासाठी नांदेड जिल्ह्यातील गावागावात बैठका सुरू आहेत. नांदेडच्या हदगाव तालुक्यातील कोळगाव येथे नुकतीच चावडी बैठक घेण्यात आली. या बैठकीत मराठा बांधव मोठ्या संख्येने सहभागी झाले होते. मराठा आंदोलक मनोज जरांगे पाटील यांच्यासोबत आम्ही देखील मुंबई येथे जाणार असल्याचा निर्धार यावेळी कोळगाव येथील मराठा समाज बांधवांनी केला आहे.