तुळजापुरात आज मराठा कार्यकर्त्यांनी महसूल मंत्री चंद्रशेखर बावनकुळे यांना घेराव घालत आपली मागणी मांडली. कार्यकर्त्यांनी मंत्री बावनकुळे यांना निवेदन देत म्हटले की, मनोज जरांगे पाटलांना मुंबईला जाण्याची वेळ येऊ देऊ नका, सरकारने तातडीने निर्णय घ्यावा. सरकार मराठ्यांचा अंत पाहत आहे का? असा संतप्त सवाल यावेळी करण्यात आला.

मराठा समाजाच्या आरक्षणाच्या मुद्द्यावर मनोज जरांगे पाटील यांच्या नेतृत्वाखाली आंदोलन सुरू आहे. या पार्श्वभूमीवर कार्यकर्त्यांनी मंत्री बावनकुळेंना त्यांच्या भूमिकेबद्दल प्रश्न विचारले. यावर प्रतिक्रिया देताना महसूल मंत्री चंद्रशेखर बावनकुळे म्हणाले, मनोज जरांगे पाटील यांच्या मराठा आरक्षण आंदोलनाबद्दल मी लवकरच मुख्यमंत्र्यांशी चर्चा करणार आहे. मराठा समाजासोबत सरकार ठामपणे उभे आहे. मराठा आरक्षणाची सुरुवात देवेंद्र फडणवीस यांच्या कार्यकाळात झाली होती. आजही मुख्यमंत्री एकनाथ शिंदे, उपमुख्यमंत्री अजित पवार आणि देवेंद्र फडणवीस यांची आरक्षणावर कायम चर्चा सुरू असते.