आंतरवालीमध्ये 20 तारखेला होणाऱ्या बैठकीमध्ये आपण समाजातील बांधवांना आपण उमेदवार पाडायचं का उभं करायचं याबद्दल विचारणा करणार आहोत आणि त्यानंतर निर्णय घेणार असल्याचं मराठा आंदोलनाचे नेते मनोज जरांगे पाटील यांनी आज आंतरवाली सराटीमध्ये घेतलेल्या पत्रकार परिषदेत म्हटलं आहे. विधानसभा इच्छुक उमेदवारांशी उद्या सकाळी 9 ते 4 वाजेपर्यंत मी चर्चा करणार आहे. ज्या बांधवांनी अर्ज केले आहे, त्यांनी उद्या चर्चेसाठी यावं. पण उद्या चर्चेला आलेल्यांनी आपलं तिकीट फायनल झालं असू समजू नका, असंही त्यांनी म्हंटलं आहे.

जरांगे पुढे बोलताना म्हणाले की, मराठ्यांचे वाटोळे करुन तुम्हाला आम्ही पुढे जाऊ देणार नाही. मविआंच्या नेत्यांपेक्षा महायुतीने मराठा समाजाला हीन वागणूक दिली आहे. सत्ताधाऱ्यांच्या मागे ओबीसी उभे नाही. मुख्यमंत्री एकनाथ शिंदे हेच मराठा समाजाला आरक्षण देऊ शकतात, पण त्यांना कोण निर्णय घेऊ देत नाही हे समजत नाही, असंही यावेळी बोलताना जरांगे यांनी म्हंटलं आहे.