उपमुख्यमंत्री देवेंद्र फडणवीस विधानसभा निवडणुकीच्या पार्श्वभूमीवर दिल्लीकडे रवाना झाले आहेत. दिल्लीत भाजपच्या वरिष्ठ नेत्यांशी ते चर्चा करणार आहेत. महायुतीतील काही जागांच्या वाटपाचा तिढा अद्याप सुटलेला नाही. या बाबत तोडगा काढण्यासाठी आज भाजपच्या पक्षश्रेष्ठींसोबत आज चर्चा करण्यात येणार आहे. यावेळी मुख्यमंत्री एकनाथ शिंदे आणि उपमुख्यमंत्री अजित पवार यांची देखील उपस्थिती असणार आहे. त्यासाठी अजित पवार आणि प्रफुल्ल पटेल हे देखील दिल्लीला रवाना झाले आहेत. उमेदवारी अर्ज भरण्यासाठी काही दिवसच उरलेले आहेत. त्यातच महायुतीत अनेक जागांवर अद्याप चर्चा होणं बाकी आहे. त्यामुळे या जागांचा तिढा सोडवण्यासाठी आज दिल्लीत केंद्रीय गृहमंत्री अमित शहा यांच्या उपस्थितीत बैठक पार पडणार आहे. आत्तापर्यंत महायुतीकडून 182 जागांवर उमेदवारी जाहीर करण्यात आली आहे. या बैठकीत उरलेल्या 106 जागांवर चर्चा होऊन या जागांचे वाटप केले जेल अशी माहिती सूत्रांनी दिली आहे.

Edited By Rakhi Rajput