महाविकास आघाडीचं 260 जागांचं जागावाटप ठरलं असून उर्वरित 28 जागांवर मात्र अद्यापही रस्सीखेच सुरू असल्याचं दिसत आहे. मात्र आजच महाविकास आघाडीचं जागावाटप निश्चित होण्याची शक्यता सूत्रांकडून वर्तवण्यात आली आहे.

गेल्या अनेक दिवसांपासून महाविकास आघाडीत जागावाटपावरून तिढा बघायला मिळत आहे. जागावाटपाचं गणित काही केल्या सुटत नसल्याचं दिसत आहे. मात्र आजच्या बैठकीत 288 पैकी 260 जागांवर अंतिम जागावाटपावर निर्णय झाला असून उरलेल्या 28 जागांवर अजूनही तिन्ही पक्षात रस्सीखेच सुरू असल्याचं बघायला मिळत आहे. तरीही याबाबत आजच निर्णय होऊन जागावाटप निश्चित होण्याची शक्यता आहे. या महत्वाच्या 28 जागांवर तिन्ही पक्षांकडून दावा करण्यात आला आहे. यात मुंबई आणि विदर्भातील जागांचा समावेश आहे. यात छोट्या घटक पक्षांना देखील जागा देण्याबाबत दबाव असल्याने हा तिढा सुटत नसल्याचं सांगण्यात येत आहे. मात्र आज अंतिम निर्णय होईल अशी शक्यता वर्तवली जात आहे.